ጋዜጠኛ እስክንድር ነጋ ከዓመት ከስድስት ወር እስር በኋላ ለመጀመሪያ ጊዜ ቃሊቲ ሰው ገብቶ እንዲጠይቀው ተፈቀደ

ከሕግ ውጪ መታሰሩን ተረድተው በያሉበት ድምፃቸውን ለሚያሰሙ ምስጋና አቅርቧል

"ስላደረጋችኹልኝ እና ስለምታደርጉልኝ ኹሉ አመሰግናለሁ!" እስክንድር ነጋ

"እስክንድር ለዚህን ያህል ወራት እስር ቤት መቆየቱን ተጠራጠርኩ፤ ጥንካሬው አሁንም አብሮት አለ" ጋዜጠኛ ጽዮን ግርማ

                                        (ዓርብ ሰኔ 7 ቀን 2005 ዓ.ም. June 14, 2013)
 ላለፉት አስራ ስምንት ወራት በእስር ላይ ያለው ጋዜጠኛ እስክንድር ነጋ ለመጀመሪያ ጊዜ ከባለቤቱ ከጋዜጠኛ ሰርካለም ፋሲል እና ከልጁ ከናፍቆት ሌላ ሰው እንዲጠይቀው በዚህ ሣምንት መፈቀዱን ለመረዳት ችለናል። ዛሬ ጠዋት ቃሊቲ ሄደው ከጠየቁት ውስጥ ጋዜጠኛ ጽዮን ግርማ አንዷ ስትሆን፤ አላግባብ ከሕግ ውጪ መታሰሩን ተረድተው በያሉበት ድምፃቸውን ላሰሙና ለሚያሰሙ ሁሉ በያሉበት ምስጋናዬ ይድረሳቸው ብሏታል።

ካላግባብ፣ ከሕግና ከሰብዓዊ መብት ውጭ ጋዜጠኛ እስክንድር ከልጁና ከባለቤቱ በስተቀር ማንም ወዳጅ ዘመድ እንዳይጠይቀው መደረጉ በገዥው ፓርቲ የፖለቲካ አመራሮች ግለሰባዊ ትዕዛዝ እንደነበር ብዙዎች ሲተቹት እንደነበር ይታወቃል። ከዚህም ሌላ የምዕራባውያን ሀገሮች ባለሥልጣናትና መንግሥታት ካላግባብ እንደ እስክንድር በእስር ላይ ያሉት ጋዜጠኞች፣ የሰብዓዊ መብት ተሟጋቾችና ፖለቲከኞች እንዲፈቱ እየጎተጎቱ ይገኛሉ።

ጋዜጠኛ እስክንድር ነጋ ከጋዜጠኛ ጽዮን ግርማ ጋር በነበረው ቆይታ እንዲህ ሲል ምስጋና አቅርቧል፤ "የታሠርኩት ከሕግ ውጭ መኾኑን ተረድታችሁ በሁሉም መንገድ እንድፈታ ለወተወታችሁ፣ ላሳሰባችሁ፣ አሁንም እየወተወታችኹ ላላችኹና ባላችኹበት ላሰባችኹኝ ኹሉ ዲሞክራሲ በአገራችን ሰፍኖ ከእስር ወጥቼ በአካል ምስጋናዬን እስካቀርብላችሁ ድረስ ባላችሁበት የከበረ ምስጋናዬ ይድረሳችሁ። እግዚአብሔር ይስጥልኝ!"።

ጋዜጠኛ ጽዮን ግርማ ዛሬ በፌስ ቡክ ገጿ ላይ "እስክንድር ነጋን አገኘሁት!" በሚል ርዕስ ባስነበበችው ማስታወሻዋ ላይ ከጋዜጠኛ እስክንድር ጋር በነበራት ቆይታ፣ ስለጋዜጠኛው ያላትን አመለካከት እንዲሁም ስለሁኔታው አስመልክታ እንዲህ ስትል አስነብባለች፦

ጋዜጠኛ እስክንድር ነጋ ቃሊቲ የሚገኘው እስር ቤት ከገባ ከዐሥራ ስምንት ወራት በላይ አስቆጥሯል። ለዚህን ያህል ጊዜም ከባለቤቱ ጋዜጠኛ ሰርካለም ፋሲል እና ከልጁ ናፍቆት በስተቀር አንድም ሰው ገብቶ እንዲጠይቀው አልተፈቀደለትም ወይም በወዳጅ ዘመዶቹ የመጠየቅ መብቱ ተነፍጎ ነበር። ከቀናት በፊት ግን ይህ መብቱ ተከብሮለት ሰዎች ገብተው እንዲጠይቁት መፈቀዱን ሰማኹና ዛሬ ጠዋት እስክንድርን ለማየት ወደ ቃሊቲ አመራሁ። እስክንድርንም አገኘኹት ብዙም ተጨዋወትን። እስክንድር ለዚህን ያህል ወራት እስር ቤት መቆየቱን ተጠራጠርኩ ጥንካሬው አሁንም አብሮት አለ።

ከእርሱ ይልቅ እርሱን ያሳሰበው በውጭ ያሉት ወዳጆቹ ጤንነት እስኪመስለኝ ድረስ በጋራ የምናውቃቸውን ሰዎች እና ጓደኞቻችንን ስም እያነሳ ጠየቀኝ። በቻልኩት መጠን ሰላምታ እንዳቀርብለትም አሳሰበኝ። በመጨረሻም እንዲህ አለኝ፤ "የታሠርኩት ከሕግ ውጭ መኾኑን ተረድታችሁ በሁሉም መንገድ እንድፈታ ለወተወታችሁ፣ ላሳሰባችሁ፣ አሁንም እየወተወታችኹ ላላችኹና ባላችኹበት ላሰባችኹኝ ኹሉ ዲሞክራሲ በአገራችን ሰፍኖ ከእስር ወጥቼ በአካል ምስጋናዬን እስካቀርብላችሁ ድረስ ባላችሁበት የከበረ ምስጋናዬ ይድረሳችሁ። እግዚአብሔር ይስጥልኝ!" መልዕክቱን በፌስቡክ ገጼ ላይ እንደማሰፍርለት ቃል ገብቼለት ተሰናብቼው ወጣሁ። በገባሁት ቃል መሠረትም ምስጋናውን አድርሻለኹ።

እስክንድር ነጋ የሞያ አጋሬ ብቻ አይደለም፤ በቀናነታቸው እና በአስተዋይነታቸው የመጀመሪያውን የወዳጅነት ቦታ ከምሰጣቸው ጓደኞቼ ውስጥ የምመድበው ሰው ነው። እስክንድር በአሳሪዎቹ እጅ ወድቆም ስለ ሌሎች ማሰብ ባለማቋረጡ እየተገረምኩ ቃሊቲን ለቅቄ ወጣሁ። ወዳጆቼ በዚህ ቤት መታሠር ሚያቆሙት መቼ ይኾን ስልም ራሴን ጠየኹ!
ምንጭ᎓ ኢትዮጲያ ዛሬ